Seguro que o Pawley é dos que pensa que non paga a pena buscar valores cinematográficos no porno contemporaneo, cada vez máis perdido nun paradóxico torbellino de minimalismo narrativo e hipertrofia expresiva. Recoñezamos, alo menos, que esta tendencia pode responder á evidencia de que salvo excepcións a maioría dos ferretes non deixan moito espazo a sofisticadas variantes da trama tradicional: comezo e desenlace.
Tamén é certo que todo depende do que entendamos por porno contemporaneo. Por exemplo, velahí teñen a Isabella Rosellini, titular xa dun background fílmico que parte da crítica considera gravemente pornográfico, e que ven de presentar no festival de Sundance Greenporno, unha colección de curtas sobre as vidas sexuais dos insectos que xa se pode ver no mundo enteiro. O trailer lémbranos ao divertidísimo Consultorio sexual para todas as especies de Olivia Judson, malia que hai algo na posta en escea que acaba por remitirnos a Agatha Ruiz de la Prada.
Home, que casualidade! Acabo de citar esas pezas nun artigo sobre o Indielisboa que acabo de rematar. Vin algunhas en Lisboa e certamente son moi moi divertidas. Duran un minuto cada unha, máis ou menos, e realmente están pensadas para as pantallas dos dispositivos móbiles, e por iso é que procuraron unha estética rechamante na que predominan as cores intensas. Isabella encarna aos bechos, e tamén escribe e dirixe.
Polo que a min respecta, iso conta como documental científico. Non sei se me explico.
